भाडाको फ्ल्याटबाट तस्करी- करोडौँको सुनचाँदी र ५८ लाख बरामद, सुन पगाल्ने मेशिन पनि भेटियो

| २०८१ असार २४ गते १५: ०६ मा प्रकाशित

ललितपुर।ललितपुरमा अवैध रुपमा सुनचाँदीको कारोबार गरिरहेको अवस्थामा प्रहरीले ६ जनालाई पक्राउ गरेको छ ।

ललितपुर महानगरपालिका-१४ ताल्छिखेलस्थित एक निर्माणाधीन घरको तेस्रो तलामा अवैध शंकास्पद कारोबार भइरहेको सूचनाका आधारमा प्रहरी वृत्त सातदोबाटोको टोलीले छापा मारेको थियो ।

उक्त घरमा छापा मार्ने क्रममा प्रहरीले भारतीय नागरिक युवराज विभुतेले भाडामा लिएको फ्ल्याटबाट ६ जना समातिएका हुन् ।

प्रहरीले खानतलासीका क्रममा पक्राउ परेकाहरूलाई सोधपुछ गर्दा काठमाडौं र ललितपुरका अन्य स्थानमा पनि फ्ल्याट भाडमा लिएर अवैध कारोबार गरेको भेटिएको छ ।

प्रहरीले उक्त घरबाट १ किलो ५८७.५१ ग्राम अवैध सुन पनि बरामद गरेको छ । त्यसैगरि उक्त घरबाट १ किलो १५३.२२ ग्राम चाँदी पनि बरामद भएको छ । बरामद उक्त धानु परीक्षण गर्दा असली सुनचाँदी पुष्टि भएको प्रहरीले जनाएको छ ।

उक्त घरबाट अवैध सुनचाँदीसँगै प्रहरीले नेपाली रुपैयाँ ५८ लाख ३५ हजार ५६० र भारतीय रुपैयाँ ८ हजार ५५० पनि बरामद गरेको छ ।

को को पक्राउ परे ?

उक्त घरको फ्ल्याटमा मुख्य कारोबारीका रुपमा रहेका भारतको महाराष्ट्रस्थित साङ्ले जिल्ला, आडवारी थाना घर भई ललितपुर-१४ ताल्छिखेल बस्ने २८ वर्षीय युवराज विभुते पक्राउ परेका छन् ।

त्यसैगरी युवराजकै साथीहरू महाराष्ट्र निवासी २० वर्षीय भारतीय नागरिक विक्रम यलवर, १८ वर्षय अभिषेख विभुते पनि पक्राउ परेका छन् । त्यसैगरी भारतको महाराष्ट्र राज्यस्थित सोलारपुर घर भई काठमाडौंको टोखा नगरपालिका-५ मैत्रीचोक aस्ने वर्ष २१ को विजय सम्पत पनि पक्राउ परेका छन् ।

प्रहरीले उक्त गिरोहमा संलग्न भक्तपुरको सूर्यविनायक नगरपालिका-१ विरुवा बस्ने बर्ष २० को सिध्दान्त चौलागाईँ, ललितपुरको महालक्ष्मी नगरपालिका वडा नं. ८ बस्ने २० वर्षीय यशवन्त सुनारलाई पनि पक्राउ गरेको छ ।

उक्त घरको फ्ल्याटबाट प्रहरीले सुनचाँदी र नगदबाहेक डिजिटल तराजु एउटा, तौल गर्ने मेसिन तीनवटा, तौल नाप्ने ढक ५ वटा र रवर छाप एउटा बरामद गरेको छ ।

त्यसैगरी प्रहरीले सुन पगाल्ने मेशिन २ वटा पनि बरामद गरेको छ । सुनको गुणस्तर परीक्षण गर्न प्रयोग हुने करात मिटर लेखिएको मेसिन एउटा र पैसा गन्न प्रयोग हुने मेसिन एउटा पनि बरामद भएको छ ।

प्रहरीले विभिन्न कम्पनीका ८ वटा मोबाइल र र नोकिया कम्पनीको किप्याडवाला कालो मोबाइल पनि एउटा बरामद गरेको छ ।

उक्त फ्ल्याटबाट प्रहरीले कालो रंगको धातुको धुलो पदार्थ ३०.२० ग्राम भएको पनि प्रहरीले जानकारी दिएको छ । त्यसैगरि सेतो रड जस्तो धातु एउटा र तामाको जस्तो तार ५८० ग्राम बरामद भएको छ ।

प्रहरीले ल्याप्टप, हार्ड डिस्क, पेनड्राइभ र नेट्वर्क भिडियो रेकर्डर ओझुआ लेखिएको कालो बाकस एकथान र नेटिस लेखिएको अर्को बाकस पनि बरामद भएको जनाएको छ ।

फ्ल्याटबाट सिमकार्ड, चेकबुक, बैंकमा नगद जम्मा गरेको भौचर, हिसाब रहेका डायरी र कपी ४ वटा, विभिन्न बिलभरपाईहरू ३० पना, अन्य कागजात ८ पाना पनि बरामद भएको ललितपुर प्रहरी परिसरले जानकारी दिएको छ ।

त्यस्तै सुन कारोबारी युवराज विभुतेको नामको चेक चारथान, सहकारीको पासबुक ७ थान, भन्सार कार्यालयको रसिद ४ पाना, बिल ठेली २ बुक पनि बरामद भएको छ ।source-khabarhub

प्रतिक्रिया दिनुहोस्