नेपाल कम्युनिष्ट पार्टीका महासचिव नेत्रविक्रम चन्द विप्लवले केही व्यक्तिले इतिहासको मजाक बनाएको टिप्पणी गरेका छन्।

जनयुद्धलाई औचित्यहिन भन्ने र अपराधजस्तो गरी इतिहासको मजाक गरिएको भन्दै समाजवादी मोर्चाका संयोजकसमेत रहेका विप्लवले आपत्ति जनाए।

सोमबार राष्ट्रिय सभा गृहमा आयोजित कार्यक्रममा उनले भने, ‘संघीय लोकतान्त्रिक गणतन्त्र भनेको जनयुद्ध र जनआन्दोलनले नेपालका सम्पूर्ण विद्रोहको रुपमा जन्माएको सन्तान हो। अहिले केही मान्छेले जनयुद्धलाई औचित्यहिन भन्न थाले। उस्तै परे अपराध भन्न थाले। त्यो देख्दा इतिहासको मजाकजस्तो लाग्छ मलाई। नायकहरु अपराधीजस्तो र अपराधीहरु नायकजस्तो बन्ने परिस्थिति बनेको अनुभव भएको छ।’

शान्ति प्रकृयाले द्वन्द्वको अवस्थालाई एउटा ढंगले व्यवस्थापन गरी संघीय लोकतान्त्रिक गणतन्त्र स्थापना भएको उल्लेख गर्दै उनले इतिहासको मजाक नगर्न चेतावनी दिएका छन्।